മരണവാർത്തയറിഞ്ഞതിന്റെ പിറ്റേന്ന് കിട്ടിയ ആത്മഹത്യ ചെയ്തയാളിന്റെ കത്ത്

കൊഴിഞ്ഞു പോയ

കഴിഞ്ഞദിവസങ്ങളിലെന്ന പോലെ

ഇന്നും ഞാനിവിടെ സുഖമായിരിക്കുന്നു.

സുഖം, സന്തോഷം, 

സുഖം, സന്തോഷ-

മെന്നിങ്ങനെയെഴുതിയെഴുതി

സന്തോഷിക്കുന്നതിന്റെ-

യാലസ്യത്തിലാണെപ്പോഴും.

ഈ ആലസ്യമൊന്നു വിട്ടു മാറാനായൊരു

യാത്ര പോകുന്നു,

ഇല്ലെങ്കിൽ ആലസ്യത്തിൽ നിന്നും

അലസതയിലേക്കുള്ള വഴുതൽ

അതീവഭീകരമായിരിക്കുമെന്നഭയത്തോടെ.

ആദ്യമേ എഴുതിയതു പോലെ

എനിക്ക് ഇ(എ)ന്നുമിവിടെ സുഖം തന്നെ.

അവിടെ നിങ്ങളും സുഖമായിരിക്കൂ.